Paunang salita

Paunang salita

Sa kurso ng aking pag-aaral at paghahanap ng kasagutan, ay marami akong natuklasang mga bagay na dati'y hindi ko mapaniwalaan.Natuklasan ko na ang tao pala ay may likas na kapangyarihan na hindi nabibigyan ng pansin dahil wala ito sa nga kategorya na tinatanggap ng karamihan. Kadalasan ito ay binabalewala at binabansagan ng mga lider ng mga sekta ng mga relihiyon bilang mga gawa ng mga diyablo upang ang mga tao ay matakot na pag-aralan ang mga ito at manatiling mangmang habang buhay.

Ang halimbawa ng mga likas na kapangyarihang ito ay ang Clairvoyance, clairsentience, clairaudience, psychometry, telepathy, mediumship or channeling, pranic healing, automatic writing, materialization, astral projection at marami pang iba.

Naging interesado akong mabuti partikular na sa astral projection, sapagkat natutuwa ako sa posibilidad na makarating ng libre sa ibat-ibang lugar hindi lamang dito sa physical plane kundi pati na din sa iba pang daigdig o, dimension. Sa simula ay parang nakakatakot itong isipin, subalit habang tumatagal ay lalo akong nagiging curious dito.

Halos dalawang buwan ko sigurong inisip-isip ito, dumating pa nga ang oras na sinubukan ko nang gawin ito. Subalit dahil wala nga akong sapat na kaalaman tungkol dito at wala naman akong mabasang libro nung mga panahong iyon na makapagtuturo sa mga paraan nito, lagi tuloy akong bigo sa pagpipilit kong makalabas sa aking katawan.

Mabuti na lamang at nagkaroon din ng kasagutan ang aking inaasam at ito ay sa pamamagitan lamang ng napaka ordinaryong paraan… sa pamamagitan ng aking panaginip.

Sa totoo lang, ang mga karanasang ito ay hindi naman talagang kagilagilalas. Sapagkat ito ay natural nang nagyayari sa maraming tao. Subalit wala silang kaalaman tungkol dito kaya nasasabi nilang ang karanasang ito ay hindi pang karaniwan.

Halimbawa nalang itong astral projection, napaka ordinaryo nito kung tutuusin dahil ito ay ginagawa nating lahat sa gabi kung tayo ay natutulog. Hindi lamang sanay ang mga tao na alalahanin ang kanilang panaginip sa kanilang pag gising, kaya madalas ay nakakalimutan nila ang mga karanasang ito. Alalahanin mo, may may mga panaginip ka na ikaw ay lumilipad o, pakiramdam mo ay nahuhulog ka. Ito ay mga yugto ng iyong astral projection na hindi mo binigyan ng gaanong pansin kaya nakalimutan mo na ang kabuoan ng iyong astral tavel.

Kaya isinasalaysay ko ngayon ang aking mga karanasan sa seryeng ito hindi lamang sa astral projection o, ang tinatawag kong lakbay kaluluwa, kundi pati na rin sa iba pang aspeto ng Paranormal studies upang magkaroon ka ng kaalaman at maunawaan mo na walang milagro dito sa mundo sapagkat ang lahat ng bagay at pangyayari dito ay may dahilan at pinaiiral ng mga likas na batas.

Layunin ko din sa pagsulat ng aklat na ito na mabuksan ang iyong diwa at kaisipan na tayo ay hindi ordinaryong tao lamang gaya ng akala ng marami. Tayo ay mga mahiwagang nilalang at ang bawat isa sa atin ay may taglay na espesyal na kapangyarihan na bigay sa atin ng Dios na may lalang.

Mula sa aking pananaliksi at pag-aaral, sa paghahanap ng kasagutan sa aking mga katanungan ay natuklasan ko na mayroon pa palang mas mataas na sa espiritual na pag-aaral maliban sa tipikal na relihiyon na aking kinagisnan. Ilan sa mga ito ay ang Theosopiya, Mahika, Kabala at iba pa. Ito ang mga tunay na pag-aaral sa mataas na antas ng espiritualidad sapagkat layunin nito na hubugin at linangin ang sariling kapangyarihang espiritual na likas sa bawat indibidual.

Inaanyayahan kita na pag-aralan at tuklasin mo ang iyong mga tagong kapangyarihan, upang ikaw ay makalaya sa kamang-mangan at maging Master ka, hindi ng ibang tao kundi ng iyong sariling daigdig.


Joel R. Dela Cruz
August 2, 2010
Naga City, Cam. Sur
Philippines